രുചിക്കൂട്ടുകളിൽ വിസ്‌മയമൊരുക്കി മാത്‌സുഹിസ

ആഗോളതലത്തിൽ ശ്രദ്ധേയമായ റസ്‌റ്ററന്റ് ശൃംഖലകളിലൊന്നാണ് നോബു. ജപ്പാൻകാരനായ നോബു മാത്‌സുഹിസ തന്റെ സ്വന്തം പേരിനെ ഒരു ആഗോള ബ്രാൻഡാക്കി മാറ്റി. പാചക കലയിൽ വൈദ്യഗ്ധ്യമുള്ളവർക്  താരപരിവേഷമുള്ള ഇക്കാലത്ത് താരങ്ങളിൽ താരമാണ്  മാത്‌സുഹിസ . അദ്ദേഹത്തിന്റെ രുചിക്കൂട്ട് ആസ്വദിക്കാനായി ലോകത്തിന്റെ വിവിധ ഭാഗങ്ങളിൽ നിന്നും രാഷ്ട്രത്തലവൻമാരും ഹോളിവുഡ് താരങ്ങളും അടക്കമുള്ളവരാണ് നോബു റസ്‌റ്ററന്റുകളിലേക്കു ഒഴുകിയെത്തുന്നത്.  

പത്തു വയസ്സുള്ളപ്പോൾ മനസ്സിൽ കടന്നുകൂടിയ സ്വപ്നമാണ് മാത്സുഹിസയെ പാചകരംഗത്തെ  സവിശേഷ വ്യക്തിത്വമാക്കിയത്. അമ്മയോടൊപ്പം ജപ്പാനിലെ ഒരു റസ്‌റ്ററന്റിൽ നിന്നു ഭക്ഷണം കഴിച്ചപ്പോൾ പരമ്പരാഗതമായ ജപ്പാൻ വിഭവമായ സൂഷിയിൽ അദ്ദേഹത്തിന്റെ മനസ്സുടക്കി.ഭാവിയിൽ തനിക്കും സൂഷി വിഭവങ്ങൾ ഒരുക്കുന്ന ഒരു പാചകവിദഗ്‌ധനാവണം  എന്ന് സ്വപ്‌നം കണ്ടു. പിന്നീടങ്ങോട്ട് സ്വപ്‍ന സാക്ഷത്കാരത്തിനായുള്ള ശ്രമങ്ങളായിരുന്നു. 1949ൽ ജപ്പാനിൽ ജനിച്ച  മാത്സുഹിസിക്  ഏഴ് വയസ്സുള്ളപ്പോൾ പിതാവ് വാഹനാപകത്തിൽ മരിച്ചു.പിന്നീട് മൂത്ത രണ്ട് സഹോദരങ്ങൾ കൂടി അടങ്ങിയ കുടുംബത്തെ മാതാവാണ് സംരക്ഷിച്ചത്. സ്കൂൾ പഠനത്തിന് ശേഷം അദ്ദേഹം ഒരു റസ്‌റ്ററന്റിൽ ജോലിയിൽ പ്രവേശിച്ചു. ആദ്യത്തെ മൂന്നു വർഷം ഭക്ഷണം പാകം ചെയ്യുന്ന പ്രദേശത്തേക് പോലും അടുക്കാൻ അനുവാദമുണ്ടായിരുന്നില്ല. പാത്രം കഴുകലും തറ വൃത്തിയാക്കലും മാത്രമായിരുന്നു ജോലി.

പാചകക്കാരുടെ കുറവു വന്നപ്പോഴാണ് ആ രംഗത്തേക് കാലെടുത്തു വയ്ക്കാൻ മത്സുഹിസക്കു അവസരം ലഭിച്ചത്. പിന്നീട് നാലു വർഷം ആത്മാർപ്പണത്തോടെ തൊഴിലെടുത്ത് ആ രംഗത്തെ ഒരു വിദഗ്ധനാകാൻ അദ്ദേഹത്തിനായി. റസ്റ്റോറന്റിലെ സ്ഥിരം സന്ദർശകനായിരുന്ന ഒരു പെറു വംശജൻ സ്വന്തമായി ഒരു സംരംഭം തുടങ്ങാനായി മത്സുഹിസയുടെ  കൂടെ ചേർത്തു. ഇരുപതിനാലാമത്തെ വയസ്സിൽ പെറുവിന്റെ തലസ്ഥാനമായ ലിമയിൽ പങ്ക്  വ്യാപാരമായി റസ്‌റ്ററന്റ് ആരംഭിച്ചു. മികച്ച ഭക്ഷണം ഒരുക്കികൊണ്ട് ശ്രദ്ധനേടിയ നോബു മത്സുഹിസയുടെ   കൈപ്പുണ്യം പെറുവിൽ ഖ്യാതി നേടി. മികച്ച നിലവാരമുള്ള മത്സ്യങ്ങൾ ഉപയോഗിച്ചുള്ള വിഭവങ്ങളിലൂടെയാണ് അദ്ദേഹം രുചിക്കൂട്ട് ഒരുക്കിയത്. ലാഭത്തിൽ മാത്രം ശ്രദ്ധ കേന്ദ്രീകരിച്ച പങ്കാളി വില കുറഞ്ഞ നിലവാരമില്ലാത്ത മത്സ്യങ്ങൾ ഉപയോഗിക്കാൻ നിർബന്ധം തുടങ്ങിയതോടെ പങ്ക് കച്ചവടം അവസാനിപ്പിച്ചു.

പിന്നീട് അലാസ്‌കയിൽ സ്വന്തമായി ഒരു സ്ഥാപനം ആരംഭിച്ചെങ്കിലും അത് കത്തിനശിച്ചതോടെ സർവ്വ സമ്പാദ്യവും നഷ്ടപ്പെട്ടു. അമേരിക്കയിലേക് കുടിയേറിയ അദ്ദേഹം പാചകത്തൊഴിലാളിയായി പണിയെടുത്ത് സമ്പാദിച്ച പണം ചേർത്തുവെച്ച്‌ 1987ൽ മാത്‌സുഹിസ എന്ന പേരിൽ ആരംഭിച്ച റസ്‌റ്ററന്റ്  വൻ വിജയമായി. മാത്‌സുഹിസ യിലെ നിത്യ സന്ദർശകനായിരുന്ന പ്രശസ്ത ഹോളിവുഡ് താരം റോബർട്ട്‌ ഡിനീറോയുടെ പ്രേരണയാൽ 1993ൽ  'നോബു ' എന്ന പേരിൽ റസ്‌റ്ററന്റ്  ശൃംഖലയ്ക്ക് തുടക്കംകുറിച്ചു. ഇപ്പോൾ ലോകമെമ്പാടുമായി 32 റസ്‌റ്ററന്റുകളിൽ രുചിക്കൂട്ടുകളെ വിസ്മയമൊരുക്കി 'നോബു 'എന്ന ബ്രാൻഡ് തലയെടുപ്പോടെ പ്രവർത്തിക്കുന്നു.

 "പണമോ പ്രശസ്‌തിയോ ആയിരുന്നില്ല തൻ്റെ ലക്ഷ്യം. ഞാനുണ്ടാക്കിയ  വിഭവങ്ങൾ ആസ്വദിക്കുന്നവരുടെ സംതൃപ്തി ആയിരുന്നു എന്റെ ചെറുപ്പം മുതലുണ്ടായിരുന്ന സ്വപ്നം " മാത്‌സുഹിസ പറയുന്നു. 

വിജയത്തിലേക്കൊരു യാത്ര

ദീപാവലി അവധിക്ക് നാട്ടിൽ പോകാൻ ബസ് ടിക്കറ്റ് കിട്ടാതെ വലഞ്ഞ  പണീന്ദ്ര  സമ എന്ന ചെറുപ്പക്കാരന്റെ യാത്ര ചെന്നെത്തിയത് കോടാനുകോടി വിറ്റുവരവുള്ള   ഒരു സംരംഭത്തിലാണ്.പിലാനിയിലെ ബിർള ഇൻസ്റ്റിറ്റ്യൂട്ട്  ഓഫ് ടെക്‌നോളജി  ആൻഡ് സയൻസിൽ (BITS) നിന്നും പഠിച്ചിറങ്ങിയ  പണീന്ദ്ര ബെംഗളൂരിലെ  ടെക്‌സാസ് ഇൻഡസ്ട്രീസീലായിരുന്നു ജോലി ചെയ്തിരുന്നത്. 2005ലെ ദീപാവലി അവധിക്ക്  സ്വദേശമായ ഹൈദരാബാദിലേക്ക് ഒരു ബസ് ടിക്കറ്റ്  ലഭ്യമാകാൻ നന്നേ പാടുപെട്ടു. പത്തോളം ട്രാവൽ  ഏജൻസികളെ  സമീപിച്ചെങ്കിലും നിരാശ ആയിരുന്നു ഫലം. യാത്ര മുടങ്ങിയെങ്കിലും ബസ് ടിക്കറ്റ് ബുക്കിങ്ങിനുള്ള ബുദ്ധിമുട്ട് അവസാനിപ്പിക്കാനുള്ള ഒരു പരിഹാരം കണ്ടെത്താമെന്ന ദൃഢനിശ്‌ചയത്തോടെ ആയിരുന്നു പണീന്ദ്ര തന്റെ താമസ സ്ഥലത്തേക്ക് മടങ്ങിയത്.   

യാത്രക്കാർക് ട്രാവൽ ഏജൻസികളിൽ കയറിയിറങ്ങാത്ത ഏതൊക്കെ ബസ്സുകളിൽ സീറ്റുകൾ ലഭ്യമാണെന്ന് അറിയാനും ബുക്ക്‌ ചെയ്യുവാനും സൗകര്യമൊരുക്കുന്ന ഒരു പോർട്ടൽ നിർമിക്കുകയായിരുന്നു ലക്ഷ്യം. സഹപാഠികളായ ചരൺ പദ്‌മരാജുവിന്റെയും സുധാകറിന്റെയും സഹകരണത്തോടെ അഞ്ചുലക്ഷം രൂപ ചെലവിൽ പോർട്ടൽ നിർമ്മിച്ചെങ്കിലും ബസ്സുടമകളും ട്രാവൽ ഏജന്റുമാരും സഹകരിക്കാൻ തയ്യാറായിരുന്നില്ല. കമ്പ്യൂട്ടറും സോഫ്റ്റ്‌വെയറുമൊന്നും പരിചിതമല്ലാതായിരുന്ന ബസ് ജീവനക്കാർ മുഖം തിരിച്ചതോടെ പുതിയ  തന്ത്രം ആവിഷ്കരിക്കേണ്ടിവന്നു. യാത്രക്കാർക്കായി  ഒരു  വെബ്  സൈറ്റുണ്ടാക്കി.  സീറ്റ്‌ ആവശ്യമുള്ളവർ ഫോണിലൂടെ വിളിച്ചറിയിച്ചാൽ ബസ് ഓപ്പറേറ്റർമാരുമായി  ബന്ധപ്പെട്ട് സീറ്റൊരുകുന്ന സംവിധാനമായി.പിന്നീട് SMS  ലൂടെ  ടിക്കറ്റെടുക്കുന്ന സംവിധാനമായി. ബെംഗളൂരിലെ ഐടി സ്ഥാപനങ്ങളിൽ കയറിയിറങ്ങി യാത്രക്കാരെ കണ്ടെത്തി. പണീത്രയുടെയും  സുഹൃത്തുക്കളുടെയും ശ്രമഫലമായി ബസ് ടിക്കറ്റ് വിൽപനയിൽ വർദ്ധന വന്നതോടെ പുറംതിരിഞ്ഞുനിന്ന ബസ് ഓപ്പറേറ്റര്മാരും ട്രാവൽ ഏജൻസികളും പുതിയ ആശയത്തെ സ്വീകരിച്ചുതുടങ്ങി . യാത്രക്കാരേയും ബസ് ഓപ്പറേറ്റർമാരെയും ട്രാവൽ ഏജൻസികളെയും ബന്ധിപ്പിക്കുന്ന സാങ്കേതിക വിദ്യ രൂപപ്പെടുത്തി. 2007ൽ രാജ്യത്തെ പ്രമുഖ ട്രാവൽ കമ്പനികളെയെല്ലാം ഉൾപെടുത്തികൊണ്ട് റെഡ് ബസ് എന്ന ഓൺലൈൻ ബുക്കിങ് സംവിധാനം വിപുലമാക്കി. ആദ്യ വർഷം 50 ലക്ഷം രൂപക്കുള്ള ടിക്കറ്റുകൾ ഓൺലൈനിൽ വിറ്റു. തൊട്ടടുത്ത വർഷം 2008ൽ വിൽപന 5 കോടിയിലേക്കും 2009ൽ 30 കോടിയിലേക്കും 2010ൽ 60 കോടിയിലേക്കും വിൽപന കുതിച്ചുയർന്നു. 2013ൽ വിൽപന 600 കോടിയെത്തി.

കർണാടക സ്‌റ്റേറ്റ് ട്രാൻസ്‌പോർട്ടുമായി വ്യാപര കരാറുണ്ടാക്കിയതും സ്മാർട്ട്‌ ഫോണുകളുടെ കടന്നുവരവും വിൽപന ഉയർത്താൻ കാരണമായി. പണീന്ദ്ര സമ എന്ന ചെറുപ്പക്കാരൻ തന്റെ ഇരുപത്തിയഞ്ചാമത്തെ വയസ്സിൽ സുഹൃത്തുക്കളുടെ സഹായത്താൽ സമാഹരിച്ച 5 ലക്ഷം രൂപയ്ക്ക് തുടങ്ങിയ കമ്പനി മുപ്പത്തിരണ്ടാമത്തെ വയസ്സിൽ വിറ്റപ്പോൾ ലഭിച്ചത് എണ്ണൂറ്   കോടിയോളം രൂപയാണ്. സൗത്ത് ആഫ്രിക്കയിലെ മാധ്യമ ഭീമൻ നാസ്‌പേഴ്സിന്റെ ഇന്ത്യൻ ഘടകമായ ഐബി ബോയാണ് റെഡ് ബസ് ഏറ്റെടുത്തത്. ലോകത്തെ ഏറ്റവും മികച്ച 50 അതിനൂതന ആശയങ്ങളിൽ ഒന്നായി ലോകോത്തര ബിസിനസ് മാഗസിൻ 'ഫാസ്റ്റ് കമ്പനി' 'റെഡ് ബസി' നെ തിരഞ്ഞെടുത്തു. ജീവിതത്തിലുണ്ടാകുന്ന ചില പ്രതിസന്ധികൾ പുതിയ ആശയങ്ങൾക്ക്  വഴിയൊരുക്കും. റെഡ് ബസ് എന്ന ആശയം പലരുടെയും പ്രശ്നങ്ങൾക്കു പരിഹാരം കണ്ടെത്താൻ സഹായകമായതോടെയാണു കൂടുതൽ ജനകീയമായത്.

അലസതയോടു വിടപറയാം

ആരെയും കുറ്റപെടുത്തിയിട്ടു കാര്യമില്ല, എൻ്റെ മടിയാണ് തോൽവിക്കു കാരണം. പരാജയപ്പെടുമ്പോഴൊക്കെ ഇങ്ങനെ സ്വയം കുറ്റപ്പെടുത്തുന്നവരാണ് ഏറെയും.തോൽവി സംഭവിച്ചവർക്കൊക്കെ ഒരു കാര്യം ഉറപ്പാണ്, താൻ കുറേക്കൂടി പരിശ്രമിച്ചിരുന്നെങ്കിൽ മെച്ചപ്പെട്ട ഫലം ലഭിച്ചേനെ. എന്നാൽ ഈ ചിന്ത വരുന്നത് പരാജയം സംഭവിക്കുമ്പോൾ മാത്രമാണ്. ചെയ്യേണ്ട കാര്യങ്ങൾ ചെയ്യേണ്ട സമയത്തു ചെയ്യുമ്പോൾ മാത്രമാണ് കാര്യക്ഷമത കൈവരിക്കാൻ കഴിയുക. ചെയ്യേണ്ട കാര്യങ്ങളെ ചെയ്യേണ്ട സമയത്തു ചെയ്യാതിരിക്കുകയോ മാറ്റിവെക്കുകയോ ചെയ്യുന്ന ശീലത്തിനാണ് അലസത അഥവാ മടി എന്ന് വിശേഷിപ്പിക്കുന്നത്.

പ്രസിദ്ധ ഫ്രഞ്ച് എഴുത്തുകാരൻ ജൂൾസ് റെനാർഡിന്റെ അഭിപ്രായത്തിൽ "അലസത എന്നത് ഒരു ശീലമാണ്, ഷീണിതനാവുന്നതിനു മുമ്പ് വിശ്രമിക്കുന്ന ശീലം." വിശ്രമം ഏതൊരാൾക്കും ആവശ്യമാണ്. എന്തെങ്കിലും തൊഴിലെടുത്തതിന് ശേഷം ഷീണമകറ്റാനുള്ള വിശ്രമം ആസ്വാദകരമാണ്. എന്നാൽ ഒരു പണിയും എടുക്കാതെ സദാ വിശ്രമിക്കണമെന്നുള്ള ചിന്തയാണ് മടിയായി മാറുന്നത്. കാലത്തു ഉണരുന്ന ഒരു വിദ്യാർഥിക്കു തനിക്കു ധാരാളം കാര്യങ്ങൾ പഠിക്കേണ്ടതുണ്ട് എന്ന ബോധ്യമുണ്ട്. എന്നാൽ കുറച്ചു നേരം കൂടി മൂടിപ്പുതച്ചു ഒന്നുറങ്ങിയിട്ടു എണീക്കാം എന്ന് ചിന്തിക്കുന്നതാണ് മടി. ഉണർന്ന് എണീറ്റ് പഠിക്കാൻ ഒരു കാരണം വേണം. ആ കാരണമാണ് നമ്മുടെ മടിയെ അകറ്റുന്നത്. തനിക്കു പലതും ചെയ്യാനുണ്ട് അഥവാ പഠിക്കാനുണ്ട് എന്ന ബോധ്യമുണ്ടായിട്ടുകൂടി പിന്നെയും പഠിക്കാതിരിക്കുന്നതാണ് ഏറ്റവും വലിയ അലസതയുടെ ലക്ഷണം.അലസത കൂടുതൽ അലസതക്കുള്ള ഇന്ധനമാണ്. പ്രവർത്തനം കൂടുതൽ പ്രവർത്തനങ്ങൾക്കുള്ള ഇന്ധനവും.എന്തെങ്കിലുമൊക്കെ പ്രവർത്തിച്ചു തുടങ്ങാതെ മടി മാറ്റാൻ കഴിയില്ല.നാം അടുത്തദിവസത്തേക്കു മാറ്റിവെക്കുന്ന കാര്യങ്ങളിൽ ഒന്നെങ്കിലും ഇന്ന് തന്നെ ചെയ്തുതീർക്കാൻ ഒന്ന് ശ്രമിച്ചു നോക്കൂ.ചെറിയ ശ്രമങ്ങൾ വിജയിക്കുമ്പോൾ കൂടുതൽ ശ്രമിക്കാനുള്ള പ്രചോദനമാകും.ഒരു വർഷത്തിന് ശേഷം ഇതേ ദിവസം ചിലപ്പോൾ നിങ്ങൾ ചിന്തിക്കാം നേരത്തെ ചെയ്തുതുടങ്ങിയിരുന്നുവെങ്കിൽ എന്ന്. നഷ്ടപ്പെട്ടുപോയ പ്രയത്നങ്ങളെകുറിച്ചോർത്തു നാളെകളിൽ പരിതപിക്കാതിരിക്കാൻ ഇന്നേ തുടങ്ങുക. തുടങ്ങാൻ നല്ല സമയം എന്നൊന്നില്ല. ഒരു നല്ല തുടക്കം കുറിക്കാൻ ഏറ്റവും നല്ല സമയം ഈ നിമിഷമാണ്, ദാ ഇപ്പോൾ നിങ്ങളുടെ മുമ്പിലുള്ള നിമിഷം.

ഒരു പഠിതാവിന്റെ മുമ്പിൽ എപ്പോഴും ഒരു ലക്ഷ്യമുണ്ടാവണം. ഈ ലക്ഷ്യമാണ് അലസത അകറ്റി അറിവ് നേടാൻ പ്രേരിപ്പിക്കുന്നത്. വലിയ ലക്ഷ്യത്തിൽ എത്തുന്നതിനുമുമ്പ് ചെറിയ ലക്ഷ്യങ്ങൾ സാക്ഷാദ്ക്കരിക്കുക. അതിനിടയിൽ വിശ്രമവും  ആവശ്യമാണ്. എന്നാൽ വിശ്രമം പിന്നീടുള്ള പ്രവർത്തങ്ങൾക്കുള്ള ഊർജം സംഭരിക്കാൻ  ഉതകുന്നതാവണം. താൽക്കാലിക സുഖങ്ങളോടുള്ള അഭിനിവേശമാണ് പലപ്പോഴും നമ്മെ മടിയന്മാരാകുന്നത്.താൽക്കാലിക സുഖകൾക്കു പിന്നാലെ പോകുന്നവർ ആത്യന്തികമായ ദുഃങ്ങളിലേക്കാവും ചെന്നെത്തുക.എന്നാൽ താൽക്കാലിക റിസ്‌കുകൾ അഥവാ ഉദ്യമങ്ങൾ എക്കാലവും ആസ്വാദ്യമായ ജീവിതം കെട്ടിപ്പടുക്കാൻ അനിവാര്യമായ അടിസ്ഥാന ശിലയൊരുക്കും. അതിനാൽ അലസത വെടിഞ്ഞു മുന്നേറുക, ആത്മവിശ്വാസത്തോടെ.

ദാരിദ്ര്യത്തിൽ നിന്നും സമ്പന്നതയിലേക്കു

അമേരിക്കൻ പ്രസിഡന്റായിരുന്ന എബ്രഹാം ലിങ്കൺ 1863  ജനുവരി ഒന്നിനാണ് ചരിത്ര പ്രസിദ്ധമായ അടിമത്വ വിമോചന പ്രഖ്യാപനം നടത്തുന്നത്. ദശലക്ഷക്കണക്കിനു ആഫ്രിക്കൻ വംശജരായ അടിമകളെ സ്വാതത്രത്തിന്റെ വെള്ളിവെളിച്ചത്തിലേക്ക് നയിച്ച പ്രഖ്യാപനം. മാഡം സി.ജെ വാക്കർ എന്ന പേരിൽ പ്രസിദ്ധയായ സാറാ ബ്രീഡ്‌ലൗ ജനിച്ചത് 1867 ലാണ്. അതിനാൽ അവളുടെ മാതാപിതാക്കളെയും മൂത്ത സഹോദരങ്ങളെയും പോലെ അടിമയായി ജനിക്കേണ്ടി വന്നില്ല.

സ്വന്തം പ്രയത്നത്താൽ അതിസമ്പന്നയായ ആദ്യത്തെ ആഫ്രിക്കൻ അമേരിക്കൻ വനിത എന്ന നിലയിലാണ് വാക്കർ ചരിത്രത്തിൽ ഇടം നേടിയത്. മികച്ച സംരംഭക എന്നതിലുപരി സാമൂഹിക പ്രവർത്തക, തൊഴിൽ പരിശീലക, പ്രചോദന പ്രഭാഷക എന്നീ നിലകളിലൊക്കെ അവർ ഖ്യാതി നേടി. ലോകത്തെ എക്കാലത്തെയും ഏറ്റവും മികച്ച സംരംഭകരുടെ പട്ടികയിൽ അവർ മുൻനിരയിലുണ്ട്.സ്വാപ്നസമാനമായ ഉന്നത ജീവിതത്തിലേക്ക് നടന്നടുക്കുമ്പോഴും പ്രതീക്ഷയറ്റ ആയിരകണക്കിന് പെൺകുട്ടികൾക്ക് ഒരു പുതിയ ജീവിതം നൽകാനും മാഡം സി.ജെ വാക്കർക്കു  കഴിഞ്ഞു. സാറാ ബ്രീഡ്‌ലൗ  ഏഴാമത്തെ വയസ്സിൽ അനാഥയായി. ജേഷ്ടസഹോദരിയുടെ സംരക്ഷണയിൽ കഴിഞ്ഞ അവൾ പതിനാലാമത്തെ വയസ്സിൽ വിവാഹിതയായി പതിനേഴാമത്തെ വയസ്സിൽ അമ്മയായി. ഇരുപതാമത്തെ വയസ്സിൽ ഭർത്താവ് മോസസിന്റെ മരണത്തെത്തുടർന്ന് വിധവ ആയ അവരുടെ പിന്നീടുള്ള ജീവിതം ക്ലേശകരമായിരുന്നു. മകൾക്ക് നല്ല വിദ്യാഭ്യാസം കൊടുക്കാനുള്ള പണം കണ്ടെത്താൻ വിവിധ ജോലികൾ ചെയ്തു. ഇക്കാലത്തു തന്റെ സമൂഹത്തിലെ സ്ത്രീകൾ അനുഭവിക്കുന്ന ചില പ്രശ്നങ്ങൾ അവർ ശ്രദ്ധിച്ചത്. താനടക്കമുള്ള ആഫ്രിക്കൻ അമേരിക്കൻ സ്ത്രീകളുടെ വലിയൊരു പ്രശ്നമായിരുന്നു താരനും മുടികൊഴിച്ചിലും. വല്ലപ്പോഴും മാത്രം കുളിക്കുന്നതും ശുചിത്വമില്ലായ്മയുമാണ്  മുടികൊഴിച്ചിലിനു കാരണമെന്നു അവർ മനസിലാക്കി.ഈ പ്രശ്നത്തിന് പരിഹാരം കണ്ടെത്താൻ അവർ മുന്നിട്ടിറങ്ങി.

മുടികൊഴിച്ചിൽ തടയാനുള്ള മരുന്ന് കണ്ടെത്താൻ നിരവധി ഗവേഷണങ്ങൾ നടത്തി. വളരെക്കാലത്തെ പ്രയ്തനങ്ങൾക്കൊടുവിൽ സാറ വികസിപ്പിച്ചെടുത്ത ഹെയർ ഓയിൽ സ്വന്തം തലയിൽ പരീക്ഷിച്ചു. വളരെ ഫലപ്രദമായ തൻ്റെ കണ്ടെത്തൽ കൂടുതൽ സ്ത്രീകളിലേക്കു അവർ എത്തിച്ചു. കൂടുതൽ ആവശ്യക്കാരെത്തിയതോടെ വ്യവസായികമായ ഉത്പാദനം ആരംഭിച്ചു.വീടുവീടാന്തരം കയറിയിറങ്ങിയുള്ളതായിരുന്നു വില്പന. അതിനായി ആയിരകണക്കിന് പെൺകുട്ടികളെയും നിയമിച്ചു. പടിപടിയായി അവർ അമേരിക്കയിൽ അറിയപ്പെടുന്ന സംരംഭകയായി. ഇതിനിടെ ചാൾസ് വാക്കറെ വിവാഹം കഴിച്ചതോടെയാണ് മാഡം സി.ജെ വാക്കർ എന്ന പേര് അവർ സ്വീകരിച്ചത്. സ്വന്തം പേരിൽ അവർ പുറത്തിറക്കിയ സൗന്ദര്യ വർധക ഉത്പന്നങ്ങൾ വിപണി കീഴടക്കി.

അതിസമ്പന്നയായ വാക്കർ തൻ്റെ സമ്പത്തിന്റെ നല്ലൊരു വിഹിതം ആഫ്രിക്കൻ അമേരിക്കൻ സ്ത്രീകളുടെ ഉന്നമനത്തിനായി വിനിയോഗിച്ചു. അവരിൽ ആത്മാഭിമാനം ഉണർത്താനും സ്വന്തം കാലിൽ നിൽക്കാനും പ്രേരണ നൽകി. കറുത്ത വർഗ്ഗക്കാർ  കടുത്ത അവഗണയും പീഡനങ്ങളും നേരിടുന്ന കാലത്താണ് മാഡം സി.ജെ വാക്കർ അവർക്കു പ്രത്യാശയും പ്രചോദനവും നൽകിയത്. "അവസരങ്ങളെ പ്രതീക്ഷിച്ചിരിക്കാതെ അവ കണ്ടെത്തുക" എന്ന് വാക്കർ അവരെയും പ്രചോദിപ്പിച്ചു. അമ്പത്തൊന്നാം വയസ്സിൽ അവർ മരിക്കുമ്പോൾ ഇരുപത്തിനായിരത്തിലേറെ സ്ത്രീകൾക്ക് തൊഴിൽ നൽകുന്ന ഒരു മഹാപ്രസ്ഥാനം പടുത്തുയർത്താൻ അവർക്കു കഴിഞ്ഞു. ഇച്ഛാശക്തിയോടെയും സ്ഥിരോത്സാഹത്തോടെയും പ്രവർത്തിച്ചാൽ ഏതൊരാൾക്കും വിജയിക്കാൻ കഴിയും എന്ന് തെളിയിച്ച മാഡം സി.ജെ വാക്കർ ഇന്നും ലോകമെമ്പാടുമുള്ള  സംരംഭകരുടെ മാതൃകയാണ്.